اسلام آباد: چیئرمین پی ٹی آئی بیرسٹر گوہر نے کہا ہے کہ عدت کیس عمران خان کو دباﺅ میں لانے کیلئے بنایا گیا ، بانی پی ٹی آئی مضبوط انسان ہیں،کیس میں عورت کے شامل ہونے کے باوجود سمجھوتہ نہیں کیا۔تفصیلات کے مطابق اسلام آباد کچہری میں میڈیا سے گفتگو کرتے ہوئے چیئرمین پی ٹی آئی بیرسٹر گوہر نے کہا کہ عمران خان کو دباؤمیں لانے کےلئے تاریخ میں پہلی بار عدت کیس بنایا گیا جو پولیٹیکل وکٹمائیزیشن ہے۔
انہوں نے کہا کہ کیس کا مقصد عمران خان کو سمجھوتے کے حالات میں لانا تھا مگر وہ مضبوط انسان ہیں ،کیس میں عورت کے شامل ہونے کے باوجود کمپرومائزڈ نہیں ہوئے۔
انہوں نے کہا کہ اسلام آباد ہائی کورٹ نے ڈائریکشن دی ہوئی ہے کہ 10 تاریخ تک کیس پر فیصلہ دینا ہے ،آج سلمان اکرم راجہ نے اپنے دلائل مکمل کر لئے ہیں ، کیس کی سماعت پیر تک ملتوی ہوئی ہے ،امید ہے کہ ہمیں اس کیس میں ریلیف ملے گا۔
اس موقع پر بانی پی ٹی آئی کے وکیل سلمان اکرم راجہ نے کہا کہ ہم نے مرکزی اپیلوں پر مفصل دلائل دیئے ہیں ،ہم نے عدالت کے سامنے شریعہ کورٹ، سپریم کورٹ اور ہائی کورٹ کے ماضی میں فیصلے رکھے ہیں۔انہوں نے کہا کہ یہ ایک ایسا کیس ہے جس میں ایک عورت کی نجی زندگی کریدنے کی کوشش کی گئی ہے، ایسا کیس عدالت میں نہیں آنا چاہئے تھا، اسلامی تعلیمات بھی ہمیں اس کی اجازت نہیں دیتی ہیں۔
