کراچی: وزیراعلی سندھ مراد علی شاہ نے آئیڈیاز 2024ءکے انعقاد کیلئے پولیس، رینجرز کو فول پروف سیکیورٹی پلان یقینی بنانے کی ہدایت کرتے ہوئے کہا ہے کہ یہ شہر کا سب سے اہم اور بڑا ایونٹ ہے، کامیابی کیلئے تمام ادارے کردار ادا کریں،نکاسی آب، سٹریٹ لائٹس مکمل کر کے شہر کی خوبصورتی کو بہتر کیا جائے۔
تفصیلات کے مطابق وزیر اعلیٰ سندھ کی زیر صدارت آئیڈیاز 2024ءکی سٹیئرنگ کمیٹی کا اجلاس ہوا جس میں صوبائی وزراء، چیف سیکرٹری، ڈی جی ڈی ای پی او میجر جنرل اسد نواز، ڈی جی رینجرز، آئی جی سندھ، کمشنر کراچی سمیت دیگر لوگ شریک ہوئے۔
ڈی جی ڈی ای پی او نے اجلاس میں بتایا کہ آئیڈیاز2024ءمیں 50 سے زائد ممالک شرکت کر رہے ہیں،ہم سندھ حکومت کے شکر گزار ہیں، وہ آئیڈیاز کے انعقاد میں بھرپور تعاون کرتی ہے۔اس موقع پر گفتگو کرتے ہوئے مراد علی شاہ نے کہا کہ 12ویں عالمی دفاعی نمائش اور سیمینار 19 تا 22 نومبر کو ہو گا،2000ءسے 2024ءتک آئیڈیاز کے انعقاد سے دفاعی ٹیکنالوجی میں ترقی کا واضح ثبوت ہے۔
انہوں نے کہا کہ آئیڈیاز کے انعقاد سے دنیا کے اہم ممالک کےساتھ اسٹریٹجک روابط مستحکم ہوئے ہیں، آئیڈیاز 2024ءایک عالمی ایونٹ ہے، جو ملک کیلئے بڑا اعزاز ہے۔انہوں نے کہا کہ آئیڈیاز کے انعقاد کےلئے پولیس اور رینجرز فول پروف سیکیورٹی پلان بنائیں یہ کا سب سے بڑا اور اہم ایونٹ ہے۔
انہوں نے ہدایت کی کہ جہاں سڑکیں، نکاسی آب اور سٹریٹ لائٹس کی ضرورت ہے وہ فوری مکمل کی جائیں، شہر کی خوبصورتی کو مزید بہتر کیا جائے۔انہوں نے کہا کہ آئیڈیاز 2024ءکے کامیاب انعقاد کےلئے تمام ادارے اپنا بھرپور کردار ادا کریں۔
