اسلام آباد: احتساب عدالت اسلام آباد نے 190ملین پاؤنڈ ریفرنس میں بشری بی بی کی ضمانت قبل از گرفتاری منظور کرتے ہوئے کیس کی سماعت 5 جولائی تک ملتوی کردی۔ تفصیلات کے مطابق احتساب عدالت اسلام آباد کے جج محمد علی وڑائچ نے اڈیالہ جیل راولپنڈی میں بانی پی ٹی آئی اور بشری بی بی کیخلاف 190ملین پاؤنڈ ریفرنس کی سماعت کی۔
ملزمان کو کمرہ عدالت میں پیش کیا گیا۔ بشری بی بی کے وکیل بیرسٹر سلمان صفدر نے دلائل دیئے۔ نیب کی جانب سے پیش کئے گئے مزید 3گواہان پر وکلاء صفائی نے جرح مکمل کی۔ڈپٹی پراسیکیوٹر جنرل نیب سردار مظفر عباسی نے بتایا کہ بشری بی بی کی گرفتاری مطلوب نہیں، چیئرمین نیب نے ان کے وارنٹ گرفتاری جاری نہیں کیے،جب وارنٹ جاری ہی نہیں ہوئے تو درخواست ضمانت غیر موثر ہے، 10ماہ قبل بھی ہمارا یہی موقف تھا کہ بشری بی بی کے وارنٹ جاری نہیں کئے۔
بعد ازاں عدالت نے بشری بی بی کی ضمانت قبل از گرفتاری کی درخواست منظور کرلی اور آئندہ تاریخ پر مزید گواہان کو طلب کر تے ہوئے ریفرنس پر سماعت 5جولائی تک ملتوی کر دی۔
