اسلام آباد : سپریم کورٹ نے توہین عدالت کیس میں 34ٹی وی چینلز کو شوکاز نوٹس جاری کرتے ہوئے 2ہفتوں میں چینل مالکان کے دستخط کیساتھ جواب طلب کرلیا۔ تفصیلات کے مطابق چیف جسٹس قاضی فائز عیسیٰ، جسٹس عقیل عباسی اور جسٹس نعیم افغان پر مشتمل تین رکنی بینچ نے فیصل واوڈااور مصطفی کمال توہین عدالت کیس میںٹی وی چینلز کو شوکاز نوٹس جاری کرنے کا حکم نامہ جاری کردیا۔عدالتی حکم میں کہا گیا ہے کہ وکیل صفائی فیصل صدیقی کے مطابق ابتدائی جواب جمع کروا دیا ہے، چینلز کے جواب پر کسی چینل مالک کے دستخط نہیں بلکہ وکیل فیصل صدیقی کے ہیں، تمام چینلز کی جانب سے دلائل کم و بیش ایک ہی طرح کے ہیں،بادی النظر میں چینلز کا جواب اطمینان بخش نہیں۔ عدالت نے پیمرا کے ذریعے 34 ٹی وی چینلز کو شوکاز نوٹس جاری کرنے کا حکم دیتے ہوئے 2 ہفتوں میں چینلز کے آپریشنل ہیڈ ،چینل مالکان یا شیئر ہولڈر کے دستخط کیساتھ جواب جمع کروانے کی ہدایت کی ہے۔
