راولپنڈی: بانی پی ٹی آئی عمران خان نے کہا ہے کہ الیکشن کو پانچ ماہ گزرنے کے باوجود پتہ نہیں چل سکا کون جیتا کون ہارا؟، دنیا کی طاقتور اسرائیلی لابی بھی آج تک امریکی کانگریس جیسی قرارداد منظور نہیں کرواسکی، حکومت قراردادیں پیش کرنے کی بجائیں ملک کا سوچے ،ملک کو صرف اوورسیز پاکستانیوں کی سرمایہ کاری ہی بچا سکتی ہے ، پی ٹی آئی سب سے مضبوط جماعت ، فاروڈ بلاک بن ہی نہیں سکتا، اختلافات کی بنیاد غلط فہمی ہے، دونوں گروپس کو ملاقات کیلئے جیل بلایا ہے، ایبسولوٹلی ناٹ کے موقف پر قائم ہوں،حکومت جھوٹ پر چل رہی ہے وزیر داخلہ فراڈ اور سفارشی ہے۔
تفصیلات کے مطابق اڈیالہ جیل راولپنڈی میں میڈیا سے گفتگو کرتے ہوئے بانی پی ٹی آئی عمران خان نے کہا کہ ہم نے عدالت میں درخواست دائر کی ہے کہ آئی ایس آئی کے کرنل اور میجر کا اڈیالہ جیل میں کیا کام ہے؟، آئی ایس آئی کے پاس سول معاملات اور عدلیہ میں مداخلت کا کوئی اختیار نہیں، سپرنٹنڈنٹ جیل صرف آئی ایس آئی کے احکامات پر چل رہا ہے دو افسران کو صرف اس وجہ سے تبدیل کیا گیا کہ مجھے کوئی رعایت نہ دے دیں۔انہوں نے کہا کہ الیکشن کو پانچ ماہ گزر گئے مجھے ابھی تک یہ نہیں پتہ کہ کون جیتا اور کون ہارا؟۔
بانی پی ٹی آئی نے کہا کہ الیکشن میں بے ضابطگیوں بارے امریکی کانگریس کی قرارداد کی 85 فیصد اراکین نے حمایت کی ،دنیا میں سب سے بڑی اور طاقتور اسرائیلی لابی بھی آج تک ایسی قرارداد منظور نہیں کروا سکی، کانگریس نے پوری تحقیق کے بعد یہ قرارداد منظور کی، امریکی خود رپورٹس اکٹھی کرتے ہیں۔
انہوں نے کہا کہ اقوام متحدہ کا بھی میرے بارے میں بیان آیا، حکومت نے کانگریس کی قرارداد کے مقابلے میں اپنی قراداد پیش کی، حکومت قراردادیں پیش کرنے کی بجائے ملک بچانے کا سوچے۔انہوں نے کہا کہ پل ڈاٹ اور فافن کی رپورٹس میں بھی دھاندلی کی تصدیق کی گئی، چیف الیکشن کمشنر کو دھاندلی کو کور کرنے کیلئے لگایا گیا ہے، سارا ملک کہہ رہا ہے کہ فراڈ الیکشن کروایا گیا ، ساری دنیا وہی کہہ رہی ہے جو کمشنر راولپنڈی اور سابق وزیراعظم انوارکاکڑ نے حنیف عباسی کو کہا تھا۔ انہوں نے کہا کہ ریٹائرڈ ججز کو ٹریبیونل میں تعینات کر کے مرضی کے فیصلے حاصل کرنے کی کوشش کی جا رہی ہے۔
انہوں نے کہا کہ سپریم کورٹ مخصوص نشستوں پر الیکشن کمیشن کا کردار دیکھے، کسی بھی جمہوریت میں ایک پارٹی کی سیٹ دوسرے کو نہیں دی جا سکتی، یہ کہیں نہیں ہوتا۔انہوں نے کہا کہ اگر یہ حکومت رہ گئی تو لکھ لیں اگلے بجٹ میں غربت ،قرض اور اخراجات مزید بڑھ جائیں گے جبکہ آمدن بہت کم ہو جائے گی۔
انہوں نے کہا کہ ملک کو صرف اوورسیز پاکستانیوں کی سرمایہ کاری ہی بچا سکتی ہے کیونکہ ان کے پاس ڈالرز پڑے ہیں، موجودہ حالات کے باعث پروفیشنل ملک چھوڑ کر جا رہے ہیں۔
انہوں نے کہا کہ پارٹی میں اختلافات بڑا مسئلہ نہیں عمر ایوب کی پارٹی کیلئے بہت خدمات ہیں، پی ٹی آئی میں کوئی فارورڈ بلاک موجود نہیں یہ ایسی پارٹی ہے جو اپنے ووٹ کی طاقت پر قائم ہوئی، پی ٹی آئی سے مضبوط جماعت ملک میں موجود نہیں اس میں فارورڈ بلاک بن ہی نہیں سکتا۔انہوں نے کہا کہ پارٹی میں اختلافات کی بنیاد غلط فہمی ہے، جمعرات کو دونوں گروپس کو ملاقات کیلئے اڈیالہ جیل بلایا ہے، کچھ لوگوں نے تشدد کے باعث اور کچھ نے فائلیں دیکھ کر پارٹی چھوڑی، دونوں کے الگ الگ کیسز ہیں، جب جیل سے باہر نکلوں گا تو پھر پارٹی میں واپسی معاملات خود دیکھوں گا۔انہوں نے کہا کہ میں آج بھی سائفر معاملے پر اپنے بیان پر قائم ہوں، میں نے کہا تھا امریکہ نے حکومت گرانے کی دھمکی دی ہے ،انہوں نے ہماری حکومت ہی گرا دی، میں آج بھی ایبسولوٹلی ناٹ کے موقف پر کھڑا ہوں۔وزیراعظم سے مذاکرات بارے سوال پر بانی پی ٹی آئی نے کہا کہ ان کے پاس مذاکرات کیلئے ہے کیا کہ ان سے بات چیت کی جائے؟، حکومت جھوٹ پر چل رہی ہے وزیر داخلہ فراڈ اور سفارشی ہے اس نے کرکٹ کے ساتھ کیا کیا، کرکٹ ٹھیک کرنے کیلئے سب سے پہلے سفارش پر چلنے والے محسن نقوی کو نکالنا ہوگا۔
