کینیڈا میں مقیم پاکستانی ویٹرنری ڈاکٹروں نے ملک اور ملک سے محبت کی ایک اور مثال قائم کردی اور پاکستان سے آنیوالے نئے گریجویٹس کی رہنمائی کیلئے ہیلپ لائن قائم کر دیا ہے۔
اس سلسلے میں سالانہ عشائیہ کی تقریب بھی منعقد کی گئی جس میں کینیڈا پاکستان ویٹرنرین ایسوسی ایشن کی جانب سے کینیڈین لائسنس حاصل کرنیوالے ڈاکٹروں کو خصوصی ایوارڈز بھی دیئے گئے۔
تقریب میں پاکستانی نژاد کینیڈین رکن پارلیمنٹ اسلم رانا اور پاکستانی قونصل خانہ کے قونصلر سندس علی خان نے بطور مہمانِ خصوصی شرکت کی، تقریب میں دو سو سے زائد پاکستانی ویٹرنری ڈاکٹرز شریک ہوئے۔
زرعی یونیورسٹی فیصل آباد کے سابق وائس چانسلر ڈاکٹر ظفر اقبال رندھاوا نے بھی تقریب سے خصوصی خطاب کیا۔ تقریب کے دوران 4 ڈاکٹرز کو اچیومنٹ ایوارڈز جبکہ ڈاکٹر جاوید مقبول کو کمیونٹی ایوارڈ اور ڈاکٹر حسیب ارشد کو کینیڈین لائسنس ملنے پر ایوارڈ سے نوازا گیا۔
