امیر جماعت اسلامی حافظ نعیم الرحمن نے کہا ہے کہ بی آرٹی پراجیکٹ ختم کر کے یونیورسٹی روڈ بحال کرنے کا مطالبہ کرتے ہوئے کہا ہے کہ میئر کراچی نے سارے ادارے اپنے قبضے میں کر رکھے ہیں، زمینوں پر قبضے کیخلاف مزاحمت کرینگے، حکومت سسٹم چلانے والوں لگام دے۔
امیر جماعت اسلامی کراچی منعم ظفر ہمراہ پریس کانفرنس کرتے ہوئے حافظ نعیم الرحمن نے کہا کہ سندھ حکومت میں کرپشن بڑا کاروبار بن چکا ہے، ان کی سرپرستی کون کر رہا ہے سب کو پتہ ہے، بی آر ٹی کے نام پر شہریوں کی تذلیل کی جا رہی ہے، اس کے ڈیزائن میں بھی مسائل ہیں۔
انہوں نے کہا کہ بی آر ٹی پروجیکٹ ختم، یونیورسٹی روڈ کو بحال کیا جائے۔
فرضی ڈاکومنٹس پر گلشن اقبال میں گھر پر قبضہ کیا جا رہا ہے۔
انہوں نے کہا کہ کسی بھی شہری کے گھر پر کوئی قبضہ کرے گا تو جماعت اسلامی مزاحمت کرے گی، کراچی کی زمینوں پر قبضہ کے خلاف جماعت اسلامی نے سیل بنا دیا ہے۔
انہوں نے کہا کہ زمینوں پر قبضے کے خلاف مزاحمت کی جائے گی، حکومت سسٹم چلانے والوں لگام دے۔
انہوں نے کہا کہ دریائے راوی کے کنارے جعلی سوسائٹیاں بنی ہوئی ہیں، جعلی سوسائٹیاں بنتی ہیں، دریائوں کے راستوں پر قبضہ کر لیا جاتا ہے، زمین پر قبضے کے خلاف جدوجہد بدل دو نظام کا اہم حصہ ہو گا۔
حافظ نعیم نے کہا کہ ایم کیو ایم نورا کشتی لڑتی ، عوام کو بے وقوف بناتی ہے، کے ڈی اے، ایل ڈی اے، ایم ڈی اے پر جب قبضہ ہو رہا تھا ایم کیو ایم ان کے ساتھ کھڑی تھی۔
انہوں نے کہا کہ قبضہ گیروں کے خلاف مزاحمت کی جائے گی، حالات کی ذمہ داری حکومت پر ہے، کراچی کے شہریوں کو لاوارث نہیں چھوڑیں گے۔
