اسلام آباد: پاکستان نے تہران میں اسماعیل ہنیہ کے قتل کی شدید مذمت کرتے ہوئے کہا ہے کہ اسرائیل کے نئے ایڈونچر ازم سے جنگ کو تقویت ملے گی،بیروت میں حملہ لبنان کی خودمختاری کی خلاف ورزی ہے، پارا چنار کی صورتحال پر ایران کا بیان غیر ضروری ہے، غیر ملکی سیاح و سفارتکار ہمارے مہمان ، حفاظت ہماری ذمہ داری ہے، افغانستان دہشت گرد گروپوں کیخلاف کارروائی کرے۔
تفصیلات کے مطابق ہفتہ وار پریس بریفنگ دیتے ہوئے ترجمان دفتر خارجہ ممتاز زہرا بلوچ نے بتایا کہ نائب وزیر اعظم اسحاق ڈار نے ایران کا دورہ کیا جہاں انہوں نے ایرانی صدر مسعود پزیشکیان کی تقریب حلف برداری میں شرکت کی اور ایرانی قیادت کو تہنیتی پیغامات پیش کئے۔انہوں نے کہا کہ حماس کے سیاسی بیورو کے سربراہ اسماعیل ہانیہ کا قتل اسرائیلی جارحیت ہے، ہم اس کی مذمت کرتے ہیں، ہماری ہمدردی فلسطینی عوام اور اسماعیل ہنیہ کے خاندان کے ساتھ ہے۔
انہوں نے کہا کہ اسماعیل ہنیہ کو شہید کرنے والوں کے خلاف کارروائی ہونی چاہئے،اسرائیل کے نئے ایڈونچرازم سے جنگ کو تقویت ملے گی۔ انہوں نے کہا کہ پاکستان بیروت پر اسرائیلی حملے کی بھی شدید مذمت کرتا ہے، یہ عالمی قوانین، اقوام متحدہ اور لبنان کی سالمیت و خودمختاری کی کھلی خلاف ورزی ہے، اسرائیل کی خطرناک جارحیت سے خطے کا امن خطرے میں ہے۔
انہوں نے کہا کہ آئندہ ہفتے پیر کے روز جموں و کشمیر کی تاریخ کے ایک سیاہ دن کی برسی ہے، 5 اگست 2019 ء کو بھارت نے جموں و کشمیر کا یکطرفہ و غیر قانونی طور پر اسٹیٹس تبدیل کیا۔ انہوں نے کہا کہ پاکستان حق خود ارادیت کے حصول تک کشمیریوں کی سیاسی و اخلاقی امداد جاری رکھے گا۔
انہوں نے کہا کہ اقوام متحدہ کی سلامتی کونسل کی رپورٹس آئی ہیں، جن سے ہماری بات کی تصدیق ہوئی ہے کہ ٹی ٹی پی کو افغانستان کے اندر سے سپورٹ ملتی ہے، اس کے نئے لوگوں کی افغانستان میں تربیت ہورہی ہے۔ انہوں نے کہا کہ ہم افغانستان سے مطالبہ کرتے ہیں کہ وہ دہشتگرد گروپس کے خلاف کارروائی کرے۔
انہوں نے کہا کہ غیر ملکی سیاح ، کاروباری حضرات اور سفارتکار پاکستان کے مہمان ہیں جن کی حفاظت ہماری ذمہ داری ہے۔انہوں نے کہا کہ کسی بھی انسان کا قتل ناقابل برداشت ہے، پاراچنار کی صورتحال پر ایرانی بیان غیر ضروری ہے جس میں پارا چنار کی مکمل صورتحال کا احاطہ موجود نہیں، وزارت داخلہ اس حوالے سے کام کر رہی ہے۔
