پشاور : مشیر اطلاعات خیبرپختونخوا بیرسٹر سیف نے کہا ہے کہ جعلی فارم 47کی حکومت کو زمین بوس کرنے میں ہی ملک کی عافیت ہے،مینڈیٹ چور حکومت نے ملک کو مسائل کی دلدل میں پھنسایا ،نئے انتخابات بھی عمران کی رہائی کے بغیر ناقابل قبول ہونگے، سازشی ٹولے کو مینڈیٹ چوری کا حساب دینا ہوگا۔تفصیلات کے مطابق قائد جمعیت مولانا فضل الرحمن کے بیان پر ردعمل دیتے ہوئے مشیر اطلاعات خیبرپختونخوا بیرسٹر سیف نے کہا کہ مولانا فضل الرحمن کو جعلی حکومت کے خلاف تحریک کا اعلان کرنا چاہئے، پہلے الیکشن کیلئے سازگار ماحول بنانا ہوگا، موجودہ الیکشن کمیشن کی موجودگی میں شفاف الیکشن کا انعقاد ناممکن ہے۔ انہوں نے کہا کہ جعلی فارم 47کی حکومت کو زمین بوس کرنے میں ہی ملک کی عافیت ہے،الیکشن کے نتائج فارم 47کے ذریعے سبوتاژ کئے گئے ہیں، موجودہ چیف الیکشن کمشنر کو آئین شکنی کی قرار واقعی سزا دینی چاہئے۔انہوں نے کہا کہ مینڈیٹ چور حکومت نے ملک کو مسائل کی دلدل میں پھنسایا ، بانی پی ٹی آئی و دیگر سیاسی کارکنان کی رہائی کے بغیر ملک آگے نہیں جا سکتا۔ انہوں نے کہا کہ نئے الیکشن بھی بانی پی ٹی آئی کی رہائی کے بغیر ادھورے اور ناقابل قبول ہونگے، سازشی ٹولے کو مینڈیٹ چوری کا حساب دینا ہوگا۔
