واشنگٹن : امریکہ میں پاکستانی سفیر مسعود خان نے کہا ہے کہ پاک امریکہ تعلقات مضبوط بنانے کیلئے ہمیں ثابت قدم رہنا چاہئے، پاکستانی امریکن کمیونٹی مضبوط پاک امریکہ شراکت داری کیلئے ستون و مربوط کڑی ہے،پاکستان پر اعتماد رکھ کر تعلقات پروان چڑھاتے رہیں۔امریکہ میں پاکستانی سفیر مسعود خان نے اپنے الوداعی پیغام میں کہا ہے کہ امریکا میں بطور پاکستانی سفیر سے اپنی ذمہ داری مکمل کر لی،مارچ 2022 سے مشترکہ طور پر پاک امریکہ تعلقات مضبوط بنانے کی کوشش کی، اس سلسلے میں امریکی انتظامیہ، کانگریس، ریاستی حکومتوں ،عالمی مالیاتی اداروں، تھنک ٹینکس، میڈیا، سول سوسائٹی ،نجی شعبے میں امریکی دوستوں کی طرف سے ملنے والی حمایت پر شکر گزار ہوں۔
انہوں نے کہا ہے کہ اتار چڑھاؤ کے باوجود ہمیں پاک امریکہ تعلقات مضبوط بنانے کیلئے ثابت قدم رہنا چاہئے، پاک امریکا مضبوط تعلقات کا قیام ایک جاری عمل ہے جس کے پیچھے 77سال کی تاریخ ہے۔انہوں نے کہا کہ حمایت اور افہام و تفہیم پر پاکستانی امریکن کمیونٹی کا بھی مشکور ہوں، پاکستانی امریکن کمیونٹی مضبوط پاک امریکہ شراکت داری کیلئے ستون اور مربوط کڑی ہے۔
انہوں نے کہا کہ پاکستانی امریکی پیشہ ورانہ تنظیموں کا بھی مشکور ہوں، پاکستانی امریکی پیشہ ورانہ تنظیموں نے مشکل لیکن امید افزا مراحل میں مدد کی۔انہوں نے کہاکہ مجھے یقین ہے کہ آپ میرے جانشین کی مکمل حمایت کریں گے، آپ کو الوداع کرتے ہوئے آپ سب کی کامیابی اور خوش حالی کیلئے دعاگو ہوں۔انہوں نے کہا کہ پاکستان پر اعتماد رکھیں اور پاک امریکہ تعلقات کو پروان چڑھاتے رہیں۔
