جمرود : خیبر پولیس چوکی پر دہشت گردوں کے حملوں کے نتیجے میں دو سیکیورٹی اہلکار شہید ہوگئے جبکہ خیبرپولیس اور ایف سی جوانوں نے بروقت کارروائی کر کے دہشت گردوں کا حملہ ناکام بنا دیا ۔ تفصیلات کے مطابق دہشتگردوں نے رات کی تاریکی میں خیبر کے علاقے جمرود تختہ بیگ میں واقع پولیس اور ایف سی کی مشترکہ چیک پوسٹ پر راکٹ لانچرز اور بھاری ہتھیاروں سے حملہ کردیا تاہم چیک پوسٹ پر موجود پولیس اور ایف سی جوانوں نے بروقت کارروائی کرتے ہوئے دہشتگردوں کا حملہ پسپا کر دیا، فائرنگ کے نتیجے میں پولیس اور ایف سی کے 2جوان شہید ہوگئے۔
حملے کے بعد سیکیورٹی اہلکاروں کی بڑی تعداد موقع پر پہنچ گئی اور علاقے کو گھیرے میں لے کر فرار ہونے والے دہشتگردوں کی گرفتاری کیلئے سرچ آپریشن شروع کر دیا۔اس حوالے سے ڈی پی او خیبر سلیم عباس کلاچی نے کہا ہے کہ پولیس جوان پہلے سے الرٹ تھے اور بہترین حکمت عملی اپناتے ہوئے دونوں چوکیوں تختہ بیگ اور نواب شاہ شہید چوکی سے بروقت کاروائی سے دہشت گرد بھاگنے پر مجبور ہو گئے۔
